La stad 2023 ha la suprastonza communala inoltrau agl uffeci per svilup dil territori dil cantun Grischun la proposta per la revisiun dalla planisaziun locala, sectur habitau. Ils acts cumpeglian il plan da zonas, la lescha da baghegiar ed il rapport corrispundent. Igl atun 2024 ha la suprastonza communala retschiert digl uffeci responsabel il rapport davart la proposta inoltrada. Tenor il rapport cantunal sto la vischnaunca surluvrar diversas tematicas. Plinavon ha igl uffeci communicau ch’ei basegni ina revisiun totala dalla planisaziun locala e buca mo ina revisiun dalla cumpart habitada. Sebasond sin il rapport vegn la suprastonza communala en stretga collaboraziun cul planisader da vischnaunca a surluvrar ils acts ils proxims meins. Cura che quella lavur ei liquidada ha liug el decuors dalla secunda mesadad digl onn 2025 la procedura da cooperaziun publica. Duront quei temps da publicaziun sa mintg’in ch’ei pertuccaus inoltrar ses giavischs e sias ponderaziuns per mauns dalla suprastonza communala.Tenor plan da termins actual duei la radunonza communala decider davart la revisiun dalla planisaziun locala la fin digl onn 2025.
Duront questa fasa transitorica valan en emprema lingia:
Per zonas las qualas ei maunca determinaziuns ella lescha da baghegiar veglia (d.a. zona per habitaziuns da persunal, zona per habitaziuns secundaras commercialisadas turisticamein/zona resort, zona da habitar 3) valan las determinaziuns dalla lescha da baghegiar nova. Sin damonda tarmetta l’administraziun communala a Vus la lescha da baghegiar nova.
Nus supplichein da s’annunziar tier l’administraziun communala tier damondas ed engraziein per Vossa capientscha.
Suprastonza communala Sumvitg