Cultura

Baselgias e capluttas

La caplutta da Sogn Benedetg da Peter Zumthor ei enconuschenta lunsch sur il cunfins dalla vischnaunca da Sumvitg. Quei ei denton mo ina dallas totalmein dudisch capluttas en vischnaunca. Ultra da quei secattan quater baselgias ella vischnaunca Sumvitg. Descripziuns historicas davart las baselgias e capluttas ein da cattar sin la pagina d’internet da Surselva Turissem.

Archiv cultural

Dapi igl onn 2016 exista a Surrein igl archiv cultural Sumvitg. Igl archiv ei vegnius realisaus dall’Uniun Archiv cultural Sumvitg. Igl intent dall’uniun ei la promoziun e conservaziun dalla cultura dalla vischnaunca da Sumvitg, specialmein ils secturs agricultura, alpegiaziun, architectura, archeologia, art, artisanadi, baselgia, cant, film, fotografia, historia, hobis, litteratura, lungatg, mistregn, musica, uniuns, turissem e.a.v..

L’uniun rimna specialmein il suandont:

• cudischs romontschs (era tudestgs che pertuccan la vischnaunca da Sumvitg)
• cudischs religius (da messa e d’oraziuns)
• cudischs da scola
• vegls contracts da venditas e cumpras ni documents d’auter cuntegn
• brevs da tut gener
• lavurs historicas e da cultura sur dalla vischnaunca
• periodicas
• retschas da cudischs
• cartas da morts
• material dallas uniuns (protocols, documents da fiastas etc.)
• entirs relaschs
• fotografias, dias e films

Dapi realisaziun digl archiv ha l’uniun rimnau numerus scazis historics che documenteschan la veta ed il mintgadi da temps vargai. Ulteriuras informaziuns ein d’anflar sin pagina d’internet dall’uniun.